SAWIRO: Degmooyinka Waaberiy & Hodan Oo U Soo Gudbay Wareega Sideed Dhamaadka Tartanka Kubadda Cagta Gobalka Banaadir.
Illaa iyo labo kulan oo ka tirsan Tartannka kubadda cagta degmooyinka gobalka banaadir ayaa galabta lagu kala ciyaaray Garoomada kubadda cagta Jaamacadaha iyo Eng –yariisow, ciyaarahan ayaa ka tirsanaa Guruubka D.
Ciyaartii ka dhacday galabta garoonka Eng-yariisow waxey u dhexeesay labada degmo ee kala ah Wadajir iyo Yaaqshiid, waxey soo bandhigeen ciyaar garbo siman oo ahayd weerar iyo weerar celis, qaybtii hore kulanka degmada yaaqshiid ayaa heshay gool waxaana iska dhaliyay daafaca dambe ee degmada wadajir Khaalid Maxamed Daqiiqadii 32-aad qaybtii hore ee ciyaarta goolkaas ayaana lagu kala nastay ay ku hoggaamineysay degmada yaaqshiid.
Qaybtii hore kulanka Garsoore Maslax ayaa bixiyay kaliya hal calaamad oo kaarka digniinta waxaana la siiyay Lambarka 18-aad ee degmada Yaaqshiid Cabdi Salaan Cilmi ma jirin wax calaamad ah ay qaateen qaybtii hore ciyaartoyda degmada wadajir.
Marka dib la isugu soo laabtay qaybtii labaad ee kulanka Macalinka degmada wadajir aya sameeyay beddalo waxaana ciyaarta beddal ku soo galay Maxamed C/dulle oo lagu beddalay Xasan Kaafi halka Maxamed C/dullaahi lagu beddalay Khaalid Maxamed Daqiiqadii 46-aad sidoo kale waxaa beddal ku soo galay ciyaarta Maxamed Abuukar oo lagu beddalay Cabdikariin C/dulle Daqiiqadii 65-aad ee ciyaarta.
Dhanka Degmada wadajir waxaa qaybtii labaad beddal ku soo galay kulanka xiddiga lagu magacaabo Maxamed Saalax oo lagu beddalay Yaasir Cali halka ciyaaryahan Guuleed Maxamed lagu beddalay Yaxye abuukar daqiiqadii 59-aad ee ciyaarta degmada wadajir ayaa qaab ciyaareed weerar ku dhisan la soo laabatay qaybtii labaad ee kulanka balse, Degmada yaaqshiid ayaa heshay goolkii labaad ee kulanka waxaana u dhaliyay lambarka 11-aad Mubaarak Maxamed Daqiiqadii 51-aad ee ciyaarta waxaana hoggaanka ciyaarta ay noqotay 2-0 ay ku hoggaamineysay degmada yaaqshiid.
Ciyaartoyda degmada wadajir oo weeraro is daba joog ku qaaday shabaqa degmada yaaqshiid ayaa heleen Gool ku laad kadib markii uu gacanta kubadda ku taabtay ciyaaryahanka lagu magacaabo Ciise Cusmaan waxaana Gool ku laadkaasi gool u beddalay lambarka 10-aad ee degmada wadajir Jabriil Abuukar Daqiiqadii 69-aad ee kulanka, natiijada ciyaarta ayaana ku soo dhamaatay 2-1 ay ku adkaatay degmada Yaaqshiid wallow labadan degmo ay isaga hareen tartanka kubadda cagta degmooyinka gobalka banaadir.
Dhanka kale garoonka jaamacadaha waxaa galabta ku ciyaaray degmooyinka Hodan Iyo Waaberi oo u soo gudbay warreega Sideed dhamaadka tartanka kubadda cagta degmooyinka gobalka banaadir ciyaartan oo ahayd mid aaad u adag waxaa 1-0 ku adkaatay degmada waaberi waxaana goolka ay ku adkaaden u dhaliyay lambarka 10-aad Mahad daqiiqadii 2-aad ee ciyaarta
Guruup D
1-aad Waaberi 7 Dhibcood
2-aad Hodan 6-dhibcood
3-aad Yaaqshiid 3-dhibcood
4-aad Wadajir 1-dhibic
WQ/ Daacad
