SAWIRRO: Kooxda Dekaddaha Oo Guul Weyn Ka Gaartay Naadiga Heegan Kulan Ka Tirsanaa Horyaalka S.P.L.
Kulankan oo ahaa mid aad u adag kana tirsanaa wejiga labaad ee horyaalka heerka koowaad ee dalkeena Somali Premier League ayaa galabta lagu cayaaray garoonka caalamiga ah Muqdisho Stadium, waxaana u soo daabasho tagay dhalinyaro aad u badan oo kala taageerayay labada kooxood.
Qaybtii hore ee cayaarta labada dhinac ayaa soo bandhigay kubbad aad u qurux badan waxaaana hoggaanka cayaarta la warreegtay kooxda kubbadda cagta Dekaddaha kaddib markii uu shabaqa soo taabtay lamabrka 10-aad Anwar Siid Cali Shakuundha caawin uu ka helay saaxiibkiisa Idiris Amiin daqiiqadii 23-aad ee kulanka, waxaana jiray fursado ay abuureen xiddigaha naadiga Heegan hase yeeshee kama faa”iideysan waxaana lagu kala nastay 1-0 ay ku hoggaamineysay cayaarta kooxda Dekaddaha.
Marka dib la isugu soo laabtay qaybtii labaad ee kulanka cayaarta oo socoto afar daqiiqo naadiga Dekaddaha ayaa hoggaanka sii dheereysatay kaddib gool uu dhaliyay xiddiga lambarka 24-aad Asagou Emeka daqiiqadii 49-aad kaas oo goosha kooxda Heegan ka toogtay meel ka baxsan diilinta ganaaxa, kooxda Dekaddaha oo soo bandhigtay cayaar qurux badan ayaa la timed goolkii saddaxaad ee cayaarta waxaana mar kale shabaqa gaaray Anwar Siid Cali Shakuundha daqiiqadii 72-aad ee cayaarta.
Dhanka kale kooxda kubbada cagta Heegan oo weerarkeedu wanaagsanaa ayaa iska soo celisay gool daqiiqadii 75-aad ee cayaarta waxeyna aheyd kubbad gool kulaad ah uu dhaliyay lambarka 11-aad C/Risaaq Cali Maara kaddib kubbad gacanta ku taabtay daafca kooxda Dekaddaha hase yeeshee naadiga Heegan waxaa quusiyay Xaaji Macalim Aadan oo dhaliyay goolkii afaraad ee kulanka kaddib caawin uu ka helay Asagou Emeka oo gool dhaliyay midna caawiyay daqiiqadii 82-aad ee kulanka, natiijada cayaarta ayaana ku soo dhammaatay 4-1 ay ku adkaatay kooxda Dekaddaha.
Garsoore Xasan Kaafi Shiine oo ahaa garsooraha kulankan ayaa bixiyay kaarka digniinta kaliya hal kaar waxaana loo taagay cayaaryahanka kooxda Dekaddaha lambarka 13-aad Suleymaan Axmed daqiiqadii 10-aad ee kulanka, ma jirin wax calaamad ah oo loo diiwaangaliyay cayaartoyda kooxda Heegan kulan cayaareedkan.
Si kastaba guusha ay gaartay kooxda Dekaddaha waxey u aheyd guul muhiim ah iyagoo kaalinta 5-aad kala baxay kooxda Jeenyo waxeyna leeyihiin 19-dhibcood halka guuldarrada soo gaartay kooxda Heegan ay sii lumineyso rajada ay ka lahaayeen hanashada horyaalka Somali Premier League.
WQ/Daacad
