SAWIRRO: Kooxda Kubbadda Cagta Horseed Oo Ku Guuleysatay Horyaalka S.P.L Muddo 40-sano Ah kaddib.
Kooxda kubadda cagta Horseed ayaa 40-sano kaddib ku guuleysatay Horyaalka heerka koowaad ee dalkeenna Somali Premier League kaddib markii Naadiga MCC oo ay la ciyaari lahaayeen kulan kala bax ah (Paly off) ay soo xaadiri waayeen garoonka.
Kooxda MCC ayaa xalay war qoraal ah ay ku daabaceen barta ay ku leeyihiin Facebook ku sheegay iney baaqatay cayaartii lagu kala saari lahaa iyaga iyo kooxda Horseed, waxaana sidoo kale maanta suxufiyiinta la hadlay guddoomiyaha kooxda MCC Abuukar Maxamed kaas oo sheegay in farsamo xumo jirto awgeed aysan suuragal aheyn iney cayaaraan kulanka fiinaalka ee lagu kala saari lahaa labada kooxood.
Dhanka kale cayaartoyda kooxda kubbadda cagta Horseed ayaa soo xaadiray garoonka Eng-yariisoow waxaana halkaasi lagu guddoonsiiyay koobka horyaalka iyadoo ay ka soo qaybgaleen wasiirka dhalinyarada iyo cayaaraha Xamsa Saciid madexweynaha xiriirka kubadda cagta Cabdiqani Saciid Carab iyo guddoomiyaha sportska gobalka banaadir Xasan Aadan Yabaroow Wiish iyo xubno kale oo ka tirsan xiriirka kubadda cagta Soomaliya.
Si Kastaba kooxda kubbada cagta Horseed ayaa ku guulaysatay 40-sano kaddib xili cayaareedka dhammaaday 2020-2021 horyaalka heerka koowaad ee dalkeenna Somali Premier League.
