Wax ka yar 24-saacadood ayey kooxda kubbadda cagta Dekaddaha katageen labo xiddig oo qayb ka ahaa safka koowaad ee naadiga Dekaddaha, shalay ayey aheyd markii uu katagay Cabdiweli Weliij kaas oo ku biiray naadiga kubbadda cagta Elaman SC, war qoraal ah oo daqiiqado ka hor kooxda Dekaddaha ku baahisay barta Facebook ayey kooxda ku sheegtay in Siid Cali Baana uu katagay naadiga kaas oo muddo 8-sano katirsanaa kooxda kubadda cagta Dekaddaha.
Daafacii dhexe kooxda Dekaddaha Siid Cali Maxamed Baana ayaa kamid ahaa daafacyadii waqtiga ugu badnaa ku qaatay kooxda kubbadda cagta Dekaddaha wuxuuna kula guulaystay saddex horyaal oo ah Somali Premier League iyo labo koob oo ah koobka super capaha dalka, tan iyo 2013-kii uu kooxda kaga soo biiray naadiga Singjed oo kamid aheyd kooxihii ka cayaarayay horyaalka heerka labaad ee dalkeenna xili cayaareedkii 2012/2013.
Warar hoose oo Astaan Sports ay heshay ayaa ku waramayo in aad loola xiriirinayo Siid Cali Baana midkood kooxaha Elman SC iyo Horseed, dhanaca kale kooxda kubbadda cagta Dekaddaha ayaa hishiis labo sano ah u kordhisay cayaaryahanka khadka dhaxe Daa’’uud Cabdullaahi Tubaal kaas oo hishiiska uu kooxda kula jiray ka dhammaaday wuxuuna kamid yahay qorshaha cusub macalin Rashiid oo dhawaan warreysi uu siiyayay Astaan Sports ku sheegay iney kooxda Dekaddaha sameyn doonto saxiixyo cusub ka hor inta uusan furmin tartanka koobka General Daa’’uud.
Si kastaba kooxda kubbadda cagta Dekaddaha oo ku dhammaysatay kaalinta 5-aad ee kala sareynta horyaalka Somali Premier League xili cayaareedkii dhammaaday ayaa hadda ku jirto diyaar garoow ka hor inta uusan furmin tartanka koobka General Daa’’uud.
