Kulankan oo u dhexeeyay kooxaha kubbadda cagta Janaral Daa’uud & Juungal kana tirsanaa guruubka D tartanka kubbadda cagta cayaartoyda maqalka la’ ayaa lagu cayaaray garoonka kubbadda cagta Macquul Stadium ee degmada Waaberi.
Cayaarta oo aheyd mid xiiso gaar ah leh labada kooxood ayaa soo bandhigay qaab cayaareed weerar iyo weerar celis ah, cayaaryahanka lambarka 8-aad Xuseen Bare ayaa hoggaanka cayaarta u dhiibay kooxdiisa Juungal daqiiqadii 10-aad ee bilowgii horre ee cayaarta, qaybtii koowaad ayaa lagu kala maray 1-0 oo hoggaanka ku hayso kooxda Juungal.
Marka dib la isugu soo laabtay qaybtii labaad cayaartoyda kooxda Janaral Daa’uud waxay sameeyeen weeraro joogta ah taas oo keentay iney helaan goolka barbaraha waxaana u saxiixay cayaaryahanka lambarka 3-aad Cabdikariin Cabdulle daqiiqadii 29-aad qaybtii labaad ee kulanka, natiijada cayaarta ayaana ku soo dhammaatay 1-1 oo labada dhinac isku mari waayeen.
Garsoore Cabdiqani Macalin oo ahaa garsooraha kulanka ayaa bixiyay labo kaar oo ah kaarka hurdiga wuxuuna kala siiyay labada kooxood cayaaryahanka lambarka 3-aad Cabdikariin Cabdulle ayaa loo taagay dhanka kooxda Janaral Daa’uud halka kooxda Juungal laga siiyay cayaaryahanka lagu magacaabo Cusmaan Cali oo lambarka 5-aad u xirto ma jirin calaamad kale uu garsooraha bixiyay.
Si kastaba is araga kulamada koowaad ee heerka guruubka ayaa soo dhammaaday waxaana bilaabanayo kulamada labaad ee heerka guruubyada tartanka cayaartoyda maqalka la’
