Waxaa si xiiso leh u socdo todobaadkii labaad tartanka cayaartoyda maqalka la’ Guruubka C waxaa shalay wada cayaaray kooxda kubbadda cagta Shiirkole oo ah kooxda difaacaneyso tartanka iyo kooxda Busley kulankooda ayaana ku soo dhammaatay barbaro.
Cayaarta oo aheyd mid aad u adag waxey labada kooxood soo bandhigeen cayaar awood ahaan garbo siman ku socotay daqiiqadii koowaad ee kulanka waxaa hoggaanka cayaarta u dhiibay kooxdiisa Busley lambarka 11-aad Liibaan Ciise Raage, waxey aheyd kubbad uu ka toogtay khadka dhexe ee garoonka goolkaas ayaa lagu kala nastay qaybtii koowaad ee kulanka.
Marka dib la isugu soo laabtay qaybtii labaad ee cayaarta kooxda kubbadda cagta Shiirkole ayaa la timid goolka barbarha waxaana u saxiixay cayaaryahanka lambarka 5-aad Cali Mire Salaad daqiiqadii 32-aad wuxuuna cayaarta ka dhigay 1-1.
Kooxda kubbada cagta Busley ayaa mar kale waxaa hoggaanka u dhiibay cayaaryahan Liibaan Ciise Raage, kaas oo dhaliyay goolkiisa labaad ee cayaarta daqiiqadii 40-aad wuxuuna cayaarta ka dhigay 2-1, hase yeeshee daqiiqado yar kaddib dhammaadkii cayaarta ayey iska soo barbareeyeen kooxda Shiirkole waxaana u dhaliyay cayaaryahanka lambarka 4-aad Najiib Maxamed daqiiqadii 46-aad, natiijada cayaarta ayaa ku soo dhammaatay 2-2 oo labada kooxood isku mari waayeen.
Garsooraha kulanka ayaa bixiya calaamadaha kaarka digniinta iyo midka casaanka waxaa cayaarta laga saaray cayaaryahanka kooxda Busley lambarka 10-aad Liibaan Maxamed halka saddex kaar oo ah kaarka digniinta loo taagay cayaartoyda kooxda Shiirkole xiddigaha kala C/naasir Axmed lambarka 4-aad, Liibaan Ciise lambarka 11-aad iyo Cabdifitaax Cabdi Xaaji ma jirin kaarar kale oo garsooraha bixiyay.
Si kastaba kooxda kubbadda cagta Shiirkole oo kulankii hore guul ka soo gaartay Guruubka C kooxda Maajo ayaa barbaro la gashay kulankii labaad naadiga Busley oo ka wada tirsan yihiin Guruubka C tartanka cayaartoyda maqalka la’
