SAWIRRO: Kooxda Xaafadda Maajo oo u gudubtay wareegga afar dhammaadka tartanka cayaartoyda maqalka la’
Kooxda kubbadda cagta Maajo ayaa u gudubtay wareegga afar dhammaadka tartanka cayaartoyda maqalka la’ kaddib markii ay ka adkaatay kooxda Geed Jaceyl cayaar ka tirsanayd wareegga sideed dhammaadka tartanka cayaartoyda maqalka la’
Kulankan oo ahaa mid aad u xiiso badan waxey labada kooxood soo bandhigeen cayaar aad u wanaagsan walloow kulanka ay ku gacan sareysay kooxda Maajo, Bile Maxamed ayaa hoggaanka u dhiibay kooxdiisa Maajo daqiiqadii 8-aad ee kulanka, kooxda Maajo ayaa mar kale heshay goolkii labaad waxaana u saxiixay Nuur Maxamed daqiiqadii 22-aad ee cayaarta, qaybta nasashada ayaa la aaday iyadoo 2-0 ay hoggaanka ku hayso Xaafadda Maajo.
Marka dib la isugu soo laabtay qaybtii ee kulanka kooxda Xaafadda Maajo ayaa la timid goolkii saddexaad waxaana u dhaliyay Nuur Maxamed daqiiqadii 29-aad ee kulanka wuxuuna cayaarta ka dhigay 3-0 oo ku horkaceyso kooxdiisa Maajo waxuuna ahaa goolkiis labaad ee cayaarta.
Kooxda Geed Jaceyl ayaa iska soo celisay hal gool daqiiqadii 33-aad waxaana u dhaliyay Cabdullaahi Cusmaan kaas oo cayaarta ka dhigay 3-1, hase yeeshee waxaa soo gabagabeeyay goolasha kooxda Maajo cayaaryahan Cabdifitaax Salaad daqiiqadii 37-aad, natiijada cayaarta ayaana ku soo dhammaatay 4-1 oo ku adkaatay kooxda Maajo.
Garsoore Cabdullaahi Xaaji ayaa bixiyay hal calaamad oo ah kaarka digniinta waxaana la siiyay cayaaryahanka lambarka 8-aad ee xaafadda Geed Jaceyl Maxamed Cabdirisaaq dhanka xaafadda Maajo wax calaamad ah looma taagin waxey muujiyeen cayaar wanaag.
Si kastaba Kooxda Xaafadda Maajo ayaa iska xaadirisay wareegga afar dhammaadka tartanka cayaartoyda maqalka la’ waxeyna sugi doonan midkood kooxdii soo adkaato kooxaha Seybiyaano & Shiirkole oo galabta wada cayaari doono wareegga sideed dhammaadka.
