Kulan ka tirsan wareegga afar dhammaadka tartanka cayaartoyda maqalka la’ oo galabta la cayaari doono.
Kooxaha kubbadda cagta Maajo & Shiirkole ayaa galabta wada cayaari doono kulan ka tirsan tartanka kubbadda cagta cayaartoyda maqalka la’ wareeggiisa afar dhammaadka, tartankan ayaa si xiiso leh ugu socdo garoonka kubbadda cagta Macqul Stadium ee Degmada Waaberi.
Kooxda kubbadda cagta xaafadda Maajo ayaa ka soo adkaatay wareegga sideed dhammaadka kooxda Geed Jaceyl halka kooxda Shiirkole oo difaacaneyso tartankan ay wareegga sideed dhammaadka ka soo adkaatay kooxda Seybiyaano.
Waa sannadkii labaad oo Astaan Sports ay u qabanayso tartan kubbadda cagta ah cayaartoyda maqalka la’ ee ku nool xaafadaha magaalada Muqdisho, waxaana sannadkii hore ku guuleysatay xaafadda Shiirkole oo maanta cayaareyso wareegga afar dhammaadka tartankan.
Kooxdii adkaato ayaa u gudbi doonto fiinaalka, waxeyna sugi doontaa kooxaha Juungal & Towfiiq oo maalinta beri wada cayaari doono wareegga afar dhammaadka tartanka cayaartoyda maqalka la’
Si kastaba tartankan cayaartoyda maqalka la’ sannadkii hore waxaa ka qaybgalay sideed kooxood halka sannadkan 12-kooxood oo loo qabtay kooxahaasi oo kala ah, Geed Jaceyl, Seybiyaano, Carafaad, Ceel-hindi, Towfiiq Baar Ubax, Shiirkole, Maajo, Busley, Buula Xubey, Juungal, iyo General Daa’uud.
