SAWIRRO: Degmada Dharkenley oo guul dirqi ah ka gaartay dhigeeda Xamar wayne tartanka k/koleyga Degmooyinka.
Degmada Dharkenley ayaa guul dirqi ah ka gaartay dhigeeda Xamar wayne kulan ka tirsanaa tartanka kubbadda koleyga Degmooyinka iyo Deegaannada Gobolka Banaadir oo galabta lagu cayaaray garoonka kubbadda koleyga Wiish Stadium ee Degmada Cabdicasiis.
Qaybtii koowaad ee cayaarta Degmada Xamar wayne ayaa la timid dhibco gaarayo 20 halka Dharkenley ay la timid 7-dhibcood oo kaliya, hase yeeshee waxey wax walbo is beddeleen qaybtii labaad ee cayaarta maadaama Degmada Dharkenley ay la timid cayaar ka duwan qaybtii hore taas oo keentay iney helaan dhibco badan.
Natiijada cayaarta ayaana ku soo dhammaatay 30-31 ay ku adkaatay Degmada Dharkenley oo hal dhibic kaga adkaatay Degmada Xamar wayne oo qaybtii hore ka sareysay, kulankan ayaa ahaa mid ka mid ah kulamada ugu adag toddobaadkan.
Garsoorayaasha dhexe ee cayaarta maamulayay kulankii galabta waxey kala ahaayeen Maxamed Axmed Calasow iyo Abuukar Muudey Xasan, cayaarta ayaana ku soo dhammaatay qaab degan mana jirin cayaaryahan kulankan laga saaray, labada Degmo ayaana soo bandhigay cayaar aad u wanaagsan walloow kulanka uu ahaa mid aad u adag.
Si kastaba Degmada Dharkenley ayaa heshay guushii koowaad Guruubka D kulankii koowaad ee cayaareen heerka Guruubyada tartanka kubbadda koleyga Degmooyinka iyo Deegaannada Gobolka Banaadir.
