Degmada Hodan ayaa gaartay guushii labaad tartanka kubbadda koleyga Degmooyinka & Deegaannada Gobolka Banaadir, kaddib markii ay ka adkaatay Degmada Waaberi cayaar ka tirsanayd Guruubka D.
Kulankan oo ahaa mid ka mid ah kulamada ugu adag tartanka kubbadda koleyga Degmooyinka waxey kala heleen qaybtii koowaad labada Degmo 32-19 oo hoggaanka ku haysay Degmada Hodan.
Qaybtii labaad cayaarta labada Degmo ayaa kala helay 50-37 waxaana 13 dhibcood guusha ku heshay Degmada Hodan oo galabta gaartay guushii labaad oo xiriir ah tartanka kubbadda koleyga iyo Deegaannada Gobolka Banaadir oo si xiiso leh ugu socdo garoonka Wiish ee Degmada Cabdicasiis.
Garsoorayaasha kulankii galabta waxey kala ahaayeen Ayuub Maxamuud Muudeey iyo Cabdisalaan Waayeel oo ka mid ah garsoorayaasha loo soo xulay iney maamulaan tartanka kubbadda koleyga Degmooyinka iyo Deegaannada Gobolka Banaadir.
Degmada Hodan ayaa kulankii hore ka soo adkaatay Degmada Dharkenley galabtana waxey garaaceen wiilasha Waaberi oo cayaaray kulankoodii koowaad galabta.
