Degmada Wadajir oo guul muhiim u ah ka gaartay Deegaanka Daarusalaam tartanka k/kolayga Degmooyinka.
Degmada Wadajir oo difaacaneyso tartanka kubbadda kolayga Degmooyinka iyo Deegaannada Gobolka Banaadir ayaa galabta guul muhiim ah ka gaartay Deegaanka Daarusalaam cayaar ka dhacday Garoonka Wiish ee Degmada Cabdicasiis.
Cayaarta oo ahayd mid aad u xiiso badan labada dhinac ayey u ahayd kulan koox kasto ay dooneysay iney guul gaarto, maadaama labada kooxood ay ku tartamayaan booska labaad Guruubka A, qaybtii koowaad ayaa lagu kala nastay 16-21 oo hoggaanka ku haysay Deegaanka Daarusalaam.
Qaybtii labaad ee cayaarta labada dhinac ayaa soo bandhigay cayaar awood ahaan garbo siman kulanka ayaana ku soo dhammaatay 51-51 si loo kala saaro labada kooxood waxaa loo baahday in lagu daro 5-daqiiqo oo dheeri ah Degmada Wadajir ayaa u suurtogashay iney kaga adkaato Deegaanka Daarusalaam 64-61 oo natiijada cayaarta ay ku soo dhammaatay.
Kulankii galabta waxaa garsoorayay Abuukar Muudey Xasan iyo Axmed Cabdullaahi Baroodo taageerayaasha labada dhinac ayaa ahaa kuwo si weyn u soo camiray Garoonka Wiish Stadium ee Degmada Cabdicasiis.
Guruubka A waxaa kaalinta koowaad hore u xaqiijisay Degmada Howl-wadaag oo dhammaan soo adkaatay 4-tii kulan ay soo cayaartay, hase yeeshee waxaa booska labaad fursad weyn u haysato iney ku soo baxdo Degmada Wadajir haddii ay ka adkaato kulanka ay la cayaari doonaan Degmada Kaaraan tartanka kubbadda kolayga Degmooyinka iyo Deegaannada Gobolka Banaadir.
