SAWIRRO: Kooxda Daash oo ku guuleysatay tartanka Kulmis Business Cup 2023
Waxaa galabta la soo gabagabeeyay tartanka kubbadda cagta Kulmis Business Cup oo ku dhawaad muddo bil ka socday magaalada Muqdisho gaar ahaan garoonka Bagaax Stadium ee degmada Wadajir.
Tartankan oo ah mid sanadle ah waxaa ka qaybgalay 20 shirkadood oo leeyihiin dhallinyaro ganacsato oo ku mideysan Kulmis, waana sanadkii 6-aad oo tartankan loo qabanayo ganacsatada ku mideysan Kulmis.
Ciyaarta fiinaalka galabta waxay u dhexeysay labada kooxood ee kala ah Bagaax & Daash oo iskugu soo haray fiinaalka tartanka kubbadda cagta Kulmis Business Cup.
Ciyaarta oo ahayd mid aad u xiiso badan waxay labada dhinac ay soo bandhigeen ciyaar aad u qurux badan, qaybtii koowaad ee kulanka ayaa lagu kala nastay 2-2.
Marka dib la isugu soo laabtay qaybtii labaad ee ciyaarta waxay labada kooxood muujiyeen dadaalo hase yeeshee natiijada ciyaarta ay ku soo dhammaatay 3-3 oo la isku mari waayay.
Labada kooxood ayaa lagu kala saaray Gool-kulaadyo waxaana 1-0 ku adkaatay kooxda Daash oo noqotay horyaalka bahda Kulmis sanadka 2023.
Ciyaarta fiinaalka galabta waxaa ka soo qaybgalay guddoomiyaha xiriirka kubbadda cagta Soomaaliya Muddane Cali Shiine, Maamulka Astaan Sports, guddoomiyaha Kulmis Maxamed Cali Saciid Jaambiyoon iyo marti sharaf kale oo lagu casuumay daawashada kulankan.
