Lionel Messi iyo Qoyskiisa oo sita 15 boorso oo ka degay Magaalada Barcelona
Lionel Messi iyo qoyskiisa ayaa ka degay Magaalada Barcelona, iyagoo sita 15 boorso oo waa weyn sida ay warinayso Warbaahinta Spain gaar ahaan Jijantes.
Waxa uu warkani dab ku sii shidayaa wararka xagta ah ee sheegaya in Weeraryahanka Paris Saint-Germain ee Lionel Messi uu dib ugu soo laaban doono kooxda Barcelona, marka uu dhammaado qandaraaskiisa uu kula jiro kooxda reer France xagaagan.
Safarka Lionel Messi ee Barcelona ayaan ahayn mid lama filaan ah maadaama ciyaaryahanka uu weli guri iyo ganacsiyo ku leeyahay Magaalada ay ka dhisan tahay kooxdiisii hore ee Barca, balse waxaa si weyn loo hadal hayaa agabka faraha badan ee ay wateen isaga iyo qoyskiisa oo ay ku jireen 15 boorso oo waa weyn, iyadoo loo qaatay in laacibku uu dib ugu soo guurayo Magaaladiisii hore.
Paris Saint-Germain ayaa dhankeeda la wariyey inay ogolaatay inay si bilaash ah ku fasaxdo Lionel Messi xagaagan marka uu dhammaado qandaraaskiisa kooxda.
Kooxda PSG ee Faransiiska waxa ay doonaysaa inay dib u habayn weyn ku sameyso siyaasaddeeda suuqa kala iibsiga xiddigaha, waxaana ay doonaysaa inay ugu yaraan yareeyaan xiddigaha magaca weyn leh ee jooga kooxda, isla markaana waxa ay rabaan inay diiradda saarayaan inay da’yar tayo leh soo saaraan.
Barcelona ayaa muddooyinkii dambe la warinayay inay si xooggan u doonayso inay dib u soo ceshato kabtankeedii hore ee Lionel Messi, iyadoo wararkii ugu dambeeyey haatan ay sheegayaa in ciyaaryahanka laftiisu uu danaynayo inuu markale ka ciyaaro garoonka Camp Nou.
Astaan Sports
