David De Gea oo Man United ka caawinaya inay la soo wareegto Harry Kane, xilli Rashford…
Goolhayaha Manchester United ee David De Gea ayaa lagu soo warramayaa inuu kooxdiisa ka caawinayo sidii ay ula soo wareegi lahaayeen weeraryahanka naadiga Tottenham ee Harry Kane.
Kooxda Man United waxa ay diyaar u tahay inay Harry Kane ka dhigto mid ka mid ah xiddigaha ugu mushaharka badan, iyagoo u soo bandhigaya lacag dhan 300 kun oo gini todobaadkii si ay u keenaan garoonka Old Trafford.
Tababare Erik Ten Hag ayaa doonaya in Harry Kane uu ku xoojiyo Weerarkiisa, inkastoo uu haatan Kane ka tirsan yahay kooxda Tottenham, hadda Man United ayaa billowday sidii ay u dhammaystiri lahayd saxiixa kabtanka xulka qaranka England.
Wargeyska The Sun ayaa warinaya in kooxda Man United ay sidoo kale u soo bandhigtay Marcus Rashford inay sare u qaaddo mushaharkiisa si la mid ah Harry Kane, maadaama ay doonayso inay heshiis cusub ka saxiixato.
Waxa uu Rashford geli doonaa sanadkii ugu dambeeyey ee heshiiskiisa dhammaadka kal ciyaareedkan, kooxda Man United ayaana si weyn u doonaysa inay sii haysato xiddigan ka soo baxay kuliyadda da’yarta ee kooxda ku dheesha Old Trafford.
Si kastaba ha noqotee, lacagaha dheeriga ah ayaa lagu soo warramayaa in lagu soo uruurin doono mushaharka laga dhimay goolhaye David De Gea, kaasoo ogolaaday inuu si weyn hoos ugu dhigo mushaharkiisa si uu qalinka ugu duugo heshiis cusub oo uu saxiixayo kooxdiisa Man United.
Astaan Sports
