Waa kee ciyaaryahanka ka tirsan Kooxda Man City ee xilli ciyaareed kasta hal kastuumo ku ciyaara?
Goolhayaha kooxda kubadda cagta Manchester City ee Ederson Moraes ayaa tibaaxay khuraafaad la yaab leh oo uu aaminsan yahay inuu marwalba ka saacido guulaha waayahiisa ciyaareed.
Taas waxa uu kala simman yahay ciyaartoy badan, hase ahaatee, khuraafaadka Ederson ayaa ka duwan dhammaan inta kale, waxaana uu aaminsan yahay inuu nasiibkiisa ku jiro inuu xilli ciyaareed walba ku ciyaaro hal nigis oo kaliya inta uu kal-ciyaareedka socdo.
Warreysi uu siiyay TNT Sports, sidoo kalena uu baahiyay wargeyska Record, ayuu goolhayaha reer Brazil ku sheegay inuu xilli ciyaareed walba ku ciyaaro hal nigis oo kaliya sidoo kalena uu baddelo marka la gaaro xilli ciyaareedka kale.
“Waxaan leeyahay khuraafaad ah inaan hal hoos-gashi aan ku ciyaaro kulan walba, had iyo jeer halkaas joog, dadka guriga jooga xitaa wey ogyihiin, iyagana dhankooda ayay ka heystaan khuraafaadkooda” ayuu Ederson yiri.
Waxaana uu sii raaciyay: “Waa midka kaliya ee aan leeyahay, illaa waagii aan ka tirsanaa Benfica, marwalba oo aan ciyaarayo ayaan gashan jiray, siddeed sano ayaan kula guuleystay toddobo horyaal, sidaas darteed, wuu ii shaqeeyay”.
Waa sax inuu Ederson ku guuleystay toddobo horyaal siddeeddii sano ee lasoo dhaafay, waxaana uu labo ka mid ah toddobaad horyaal uu lasoo qaaday kooxda reer Portugal ee Benfica, halka tan iyo imaatinkiisii Man City-na uu ku guuleystay shan horyaal oo Premier League, kaliya Liverpool ayaa ka dhex gashay fasal ciyaareedkii 2019-20.
Sidoo kale, waxa uu kooxda Etihad ku ciyaarto kula guuleystay hal FA Cup iyo tartanka Carabao Cup tiro afar jeer ah, balse nasiibkiisa kastuumada ma uusan ku shaqeyn tartanka Champions League inkastoo uu sanad ciyaareedkan ay kooxdiisa ciyaareyso fiinal-ka Tartanka Champions League oo ay kula balansan tahay kooxda Taliyaaniga ah ee Inter Milan 10-ka bisha June kulan ka dhici doono magaalada Istanbul ee dalka Turkiga.
Si kastaba ha ahaatee, 29-sano jirka shabaqa u ilaaliya kooxda dhawaan hanatay horyaalka Premier League ayaa koobab badan ku guuleystay isagoo sidoo kale qaadanaya xilli ciyaareed qurux badan maadaama ay kooxdiisa hammineyso inay hanato saddexley koobab ah, kaddib horyaalkana ay tartanka FA Cup ka qaadeen Manchester United, isla markaana ay kaliya u baahan yihiin inay final-ka Champions League ku garaacaan Inter Milan Sabtida soo aaddan si ay u xaqiijiyaan saddexleydooda koobabka ah kal ciyaareedkan.
Astaan Sports
