RASMI: Kooxda Paris Saint-Germain oo shaacisay saxiixa Ousmane Dembele
Kooxda Paris Saint-Germain ayaa dhammaystirtay saxiixa Weeraryahan Ousmane Dembele oo ay kala soo wareegeen naadiga Barcelona.
26-sano jirkaan ayaa kooxda reer France ugu biiray lacag lagu qiyaasay 50 milyan oo euro oo u dhiganta 43.2 milyan oo gini, waxaana uu qalinka ugu duugay qandaraas shan sanadood ah oo garoonka Parc des Princes ku sii hayn doona ilaa sanadka 2028.
Heshiiska Dembele ayaa soo afjaray waqtigiisii dhaawacyada ee garoonka Camp Nou, dhaawacyadaas ayaana sababay inuu Barca u saftay 185 kulan tartammada oo dhan lix sanadood oo uu ku sugnaa.
Xiddiga xulka qaranka Faransiiska kula guuleystay koobkii Adduunka 2018 ayaa saftay 35 kulan xilli ciyaareedkii hore, waxaana uu u dhaliyey siddeed gool, taasoo ka dhigaysa guud ahaan goolashiisa kooxda Catalan 40 gool tartammada oo dhan.
Tallaabadan ayaa ka dhigan in Dembele uu ku laabtay horyaalka Ligue 1 markii ugu horreysay tan iyo xilli ciyaareedkii 2015-16, markaasoo uu u dhaliyay 12 gool 29 kulan oo uu u saftay kooxda Rennes markii uu yaraa.
Kooxda PSG ayaa kulankeeda furitaanka horyaalka Ligue 1 xilli ciyaareedka cusub kulanka ay caawa garoonkeeda ku soo dhoweynayso Lorient, iyadoo Dembele uu kulankiisa ugu horreeya kooxda ka dhisan caasimadda Faransiiska safan karo ciyaarta ay booqanayaan naadiga Toulouse todobaadka soo socda.
Astaan Sports
