Roberto Firmino oo saddexley dhaliyay kulankii furitaanka horyaalka Saudi Pro League.
Weeraryahanka kooxda Al Ahli ee reer Brazil Roberto Firmino ayaa dhaliyay seddexleydiisii ugu horreysay kaddib markii 3-1 kaga badiyeen kooxda Al Hazem furitaanka xilli ciyaareedka cusub horyaalka Saudi Pro League.
Weeraryahankii hore ee Liverpool ayaa labo gool dhaliyay 10-kii daqiiqo ee ugu horreysay ka hor inta uusan gool kale dhalin daqiiqadii 72-aad ee seddexleydiisii wuxuu u xaqiijiyay seddexda dhibcood ee kooxdiisa cusub xilli ciyaareedkan.
Al Ahli iyo Al Hazem ayaa ahaa laba ka mid ah afarta kooxood ee u soo dalacday horyaalka heerka kowaad ee Saudi Arabia.
Kooxda martida loo ahaa ee Al Ahli, ayaa hoggaanka ciyaarta qabatay daqiiqadii lixaad kaddib markii uu madax ku dhaliyay Firmino, kaasoo labo gool ka caawiyay garabkii hore ee Manchester City iyo saaxiibkiis cusub ee Riyad Mahrez 10-ka daqiiqo ee ugu horreysay.
Markii dib la isku soo laabtay qeybtii labaad ee ciyaarta Al Hazem ayaa gool dib u soo celisay shan daqiiqo kaddib markii Vina uu ku ciqaabay khalad uu sameeyay goolhaye Édouard Mendy, kaasoo ay Chelsea kala soo wareegtay kooxda Al Ahli.
Firmino, ayaa dhaliyay goolkiisa saddexaad daqiiqadii 72-aad natiijada ciyaarta ayaana ku soo dhammaatay 3-1 oo ku adkaatay kooxda Al Ahli.
Kooxda difaacanaysa horyaalka ee Al Ittihad oo la soo saxiixatay xiddiga ku guulaystay abaal marinta Ballon d’Or ee Karim Benzema oo ay kala soo wareegtay kooxda Real Madrid iyo khadka dhexe ee Chelsea ee N’Golo Kanté ayaa kulankoodii ugu koowaad Axada ku ciyaari doono garoonka Al Raed.
Cristiano Ronaldo iyo kooxdiisa Al Nassr, oo kaalinta labaad ku dhammaysatay xilli ciyaareedkii hore ayaa la ciyaari doono kooxda Al Ettifaq isniinta, ciyaartan ayaa laga yaabaa in ay isku arkaan saaxiibadii hore ee Liverpool Sadio Mane oo ku biiray Al Nassr todobaadkii hore iyo Jordan Henderson oo ku biiray kooxda Al Ettifaq.
Astaansports.
