SAWIRRO: Kooxda Gaadiidka oo iska xaadirisay afar dhammaadka koobka General Daa’uud Cup.
Kooxda kubbadda cagta Gaadiidka ayaa iska xaadirisay wareegga afar dhammaadka tartanka kubbadda cagta General Daa’uud Cup 2023, kaddib markii ay ka adkaatay dhigeeda Waxool.
Ciyaartan oo ka tirsanayd lugta labaad ee wareegga sideed dhammaadka koobka General Daa’uud Cup 2023, labada dhinac ayaa soo bandhigay qaab ciyaareed weerar iyo weerar celis ah, waxaana qaybtii koowaad lagu kala nastay 0-0 inkastoo ay labada kooxood ay abuureen fursado aan gool noqon.
Qaybtii labaad ee ciyaarta kooxda Gaadiidka waxaa hoggaanka kulanka u dhiibay ciyaaryahanka lambarka 11-aad Cabdisalaan Daanya daqiiqadii 60-aad, iyadoo natiijada ciyaarta ay ku soo dhammaatay 1-0 oo ku adkaatay kooxda Gaadiidka oo u gudubtay wareegga afar dhammaadka tartanka kubbadda cagta Gerneral Daa’uud Cup 2023.
Kooxda Gaadiidka ayaa la ciyaari doonto wareegga afar dhammaadka tartanka kubbadda cagta General Daa’uud 2023, maalinta Jimcaha oo taariikhdu tahay 08/09/2023 kooxda Elman Sc oo tartankan ka soo reebtay kooxda Heegan.
