Tartanka kubbadda cagta ciyaartoyda maqalka la’ ayaa si rasmi uga furmay magaalada Muqdisho sanadkii afaraad oo xiriir ah tan iyo markii Astaan Sports ay bilowday qabashada tartankan.
Waxaa sanadkankan ka qaybgalayo sideed kooxood oo laga soo xulay degmooyinka caasimada Muqdisho.
Shalay waxaa nasiib u yeeshay kulanka furitaanka kooxaha kala ah Seybiyaano & Xamar Jadiid cayaartan oo ahayd mid aad u xiiso badan qaybtii koowaad ayaa lagu kala nastay 0-0 oo labada kooxood ay isku mari waayeen,
Marka dib la isugu soo laabtay qaybtii labaad ee cayaarta waxaa hoggaanka u dhiibay kooxda Seybiyaano ciyaaryahankooda lambarka 10-aad Sharmaarke dhammaadkii ciyaarta waxaana natiijada ay ku soo dhammaatay 1-0 oo ku adkaatay kooxda Seybiyaano.
Waa sanadkii afaraad oo lagu qabanayo tartankan garoonka kubbadda cagta Macquul Stadium ee degmada Waaberi, iyadoo Astaan Sports ay u qabaneyso tartankan ciyaartoyda maqalka la’ ee ku nool degmooyinka kala duwan ee Muqdisho.
