Kooxda kubbadda cagta Heegan SC ayaa barta ay ku leedahay Facebook ku xaqiijisay inuu shaqada tababarnimo ee kooxda uu ka tagay macalin Cabdiwali Maxamuud Maxamuud (Cabdi Joon) oo kooxda ku sugnaa muddo labo sano ah.
Macalin Cabdi Joon ayaa Heegan ku soo biiray 03/08/2021, waxaana xilligaasi uu qalinka ku duugay hishiis labo sano ah.
Macalinkii hore ee kooxaha Horseed, Dekaddaha, Elman Iyo Raadsan ayaa kaga soo biiray Heegan kooxda Raadsan uu maamulayay xili cayaareedkii 2020-2021.
Macalin Cabdi Joon oo horey u soo hoggaamiyay kooxaha ugu waaweyn horyaalka dalkeenna ayaan wax koob ah u qaaday labadii sano ee maamulayay kooxda Heegan,
Macalin Cabdi Joon oo koobab kala duwan ku soo guuleystay isagoo cayaaryahan iyo macalin ah ayaa raadinayo inuu ku guuleysto horyaalka heerka koowaad ee dalkeenna Somali Premier League markiisa ugu horreysay.
Kooxda Heegan ma shaacin sababaha kooxda uu ugu tagay waxaana xusid mudan in hishiiska uu kula jiray kooxda Heegan uu ahaa labo sano.
