SAWIRRO: Kooxaha Heegan & MCC oo barbaro ku kala baxay horyaalka Somali National League 2023/2024
Kooxda kubbadda cagta Heegan oo ku ciyaareysay 10-ciyaartoy ayaa barbaro la gashay naadiga MCC kulan ka tirsanaa horyaalka heerka koowaad ee Somali National League, kulankoodii koowaad xilli ciyaareedka cusub 2023/24.
Kulankan oo ahaa mid aad u adag waxay labada kooxood soo bandhigeen ciyaar aad u xiiso badan wallow ay jireen fursado ay abuureen labada dhinac hase yeeshee wax gool ah la iskama dhallin.
Qaybtii labaad ee ciyaarta garsoore Maxamed Soomaali ayaa garoonka ka saaray ciyaaryahan kooxda Heegan Yige Mohamud kaddib markii uu qalad galay inkastoo aysan ka faa’iideysan kooxda MCC, natiijada ciyaarta ayaana ku soo dhammaatay 0-0.
Wareegga koowaad ee horyaalka Somali National League 2023/2024 ayaa si xiriir ah loo ciyaari doonaa illaa 10/02/2024 sida ku cad jadwalka Xiriirka Soomaaliyeed ee Kubbadda cagta.
