Kooxda kubbadda cagta Gaadiidka ayaa guul ka gaartay naadiga Heegan kulan ka tirsanaa horyaalka Somali National League, oo lagu ciyaaray garoonka kubbadda cagta Eng-yariisow ee Degmada Cabdicasiis.
Qaybtii koowaad ee kulanka labada kooxood ayaa soo bandhigay ciyaar weerar & weerar celis ah waxaana jiray fursado ay abuureen labada dhinac, hase yeeshee waxaa lagu kala nastay 0-0.
Marka dib la isugu soo laabtay qaybtii labaad ee ciyaarta kooxda Gaadiidka ayaa heshay gool uu u dhalliyay dhammaadkii ciyaarta ciyaaryahanka lambarka 9-aad Adepelle, daqiiqadii 87-aad ee ciyaarta waxaana natiijada kulanka ay ku soo dhammaatay 1-0 oo ku adkaatay kooxda Gaadiidka.
Kooxda kubbadda cagta Gaadiidka ayaa hadda leh afar dhibcood labo kulan ay ciyaartay horyaalka Somali National League, kulankii koowaad waxay barbaro 1-1 la soo gashay kooxda Dekedaha halka kulanka soo socdo ay la ciyaari doonto kooxda Elman SC oo kamid ah kooxaha ugu adag horyaalka.
Kooxda Heegan waxaa soo gaartay guuldarradii ugu horreysay xilli ciyareedkan cusub 2023/24 horyaalka Somali National League, Heegan ayaa kulankoodii koowaad barbaro 0-0 ah la soo gashay kooxda MCC halka kulankan laga adkaaday waxaana ay sidaasi ku leedahay 1-dhibic labo kulan ay ciyaareen
Horyaalka kubbadda cagta Somali National League ayaa si xiiso leh uga socdo garoonka kubbadda cagta Eng-yariisow ee degmada Cabdicasiis.
