SAWIRRO: Macalin Muraad oo Kooxdiisa Jeenyo ku hoggaamiyay guushiisa horreysay Somali Natinal League
Macalinka cusub ee kooxda k/cagta Jeenyo Muraad ayaa kooxdiisa la gaaray guushiisa ugu horreysay horyaalka Somali Natinal League, kaddib markii kooxdiisa ay ka adkaatay kooxda Badbaado ciyaar ka dhacday garoonka kubbadda cagta Muqdisho Stadium.
Qaybtii koowaad ee kulanka waxaa hoggaanka ciyaarta u dhiibay kooxda Jeenyo ciyaaryahanka lambarka 18-aad Irrie Moustapha kaddib markii meel ka baxsan diilinta ganaaxa kooxda Badbaado ka toogtay kubbad uu si qaldan u soo baasay daafaca kooxda Badbaado daqiiqadii 19-aad ee kulanka.
Dhammaadkii qaybtii saddex daqiiqo oo lagu daray ayay heleen goolka barbaraha kooxda Badbaado waxaana u dhalliyay ciyaaryahanka lambarka 9-aad Saalim Ramadaan waxaana lagu kala nastay 1-1.
Qaybtii labaad ee ciyaarta kooxda Jeenyo ayaa heshay goolka guusha waxaana u saxiixay ciyaaryahanka lambarka 99-aad Cabdicasiis Safamaayo daqiiqadii 54-aad waxaana natiijada ciyaarta ay ku soo dhammaatay 2-1 oo ku adkaatay kooxda Jeenyo iyadoo macalinka dhawaangalka uu ku hoggaamiyay kooxda Jeenyo guushiisa koowaad ee horyaalka Somali Natinal League.
kooxda Jeenyo oo ciyaartay kulankii 10-aad ayaa gaartay guushii saddexaad waxay barbaro galeen saddex ciyaar halka laga adkaaday afar kulan horyaalka Somali National League.
Dhanka kale kooxda Badbaado oo ciyaartay kulankii 10-aad ee horyaalka heerka koowaad ee Somali Natinal League ayaa la kulantay guuldarradii 7-aad kaliya labo kulan ayay barbaro galeen waxayna adkaadeen hal kulan kaas oo ahaa ciyaarta furitaanka Somali Natinal League.
Isbuucii 10-aad ee horyaalka Somali Natinal League ayaa si xiiso leh ugu socdo garoonka kubbadda cagta Muqdisho Stadium.
