Hoggaamiyaasha horyaalka Somali Natinal League ee Dekedaha ayaa barbaro la galay kooxda Horseed oo ku jirto kaalinta labaad ee kala sareynta horyaalka.
Kulankan oo ahaa mid aad u adag ayaa lagu ciyaaray garoonka kubbadda cagta Muqdisho Stadium waxaana daqiiqadii labaad hoggaanka u dhiibay kooxda k/cagta Horseed daafaca lambarka 4-aad Cali Cadde kaas oo madax ku dhalliyay kubbad gees-laad ahayd waxaana lagu kala nastay qabtii koowaad ee kulanka kooxda Horseed oo hoggaanka ku hayso 1-0.
Marka dib la isugu soo laabtay kooxda Dekedaha ayaa la timed goolka barbarha waxaana u dhalliyay kabtankooda Xaaji Macalim daqiiqadii 52-aad iyadoo natiijada ciyaarta ay ku soo dhammaatay 1-1 oo labada kooxdood oo ku tartamayo hanashada horyaalka ay ku kala baxeen.
Kooxda Dekadaha oo ciyaartay kulankii 10-aad ayaa gashay barbarihii 3-aad waxay guuleysteen 7-kulan halka aan laga adkaanin, waxayna sidaasi ku leeyihiin 24-dhibcood horyaalka Somali National League iyagoo hoggaanka ku hayo saddex dhibcood.
Dhanka kale Kooxda kubbadda cagta Horseed ayaa gashay barbarihii 3-aad waxay guul gaareen lix kulan, kaliya hal kulan ayaa laga adkaaday waxayna leeyihiin 21-dhicood horyaalka Somali Natinal League.
