SAWIRRO: Jaamacadda Horseed Oo Noqotay Horyaalka Tartankii Jaamacaddaha Gobalka Banaadir.
Waxaa shalay la soo gabagabeeyay tartankii kubbadda cagta ee Jaamacaddaha oo Astaan Sports ay u qabatay Ardeyda wax ka barato Jaamacaddaha ka jiro dalka, tartankan oo ahaa mid aad u xiiso badan ayaa ku dhawaad muddo bil ah lagu cayaarayay garoonka kubadda cagta Macquul Stadium ee degmada Waaberi waxaana tartankan ka qaybgalay 20 jaamacaddood oo kamid ah jaamacaddaha waxbarashada gobalka Banaadir.
Kulankii fiinaalka ayaa dhexmaray Jaamacaddaha kala ah Al-Imra International University & Horseed International University labada Jaamacadood ayaa soo bandhigay qaab cayaareed aad u soo jiitay dadkii u soo daabasho tagay kulan cayaareedkan, qaybtii hore ee kulanka waxaa hoggaanka cayaarta la warreegtay Jaamacadda Al-Imra waxaana goolka u dhaliyay cayaaryahanka lambarka 11-aad Maxamed Cabdi daqiiqadii 22-aad goolkaas ayaa lagu kala nastay qaybtii koowaad ee kulanka.
Marka dib la isugu soo laabtay qaybtii labaad ee cayaarta Jaamacadda Horseed ayaa iska soo barbareysay goolka hoggaanka looga hayey waxaana u dhaliyay cayaaryahanka lambarka 7-aad Maxamed Cabdrisaaq daqiiqadii 50-aad, wixii intaa ka dambeeyay waxaa jiray fursado kale ay abuureen labada dhinac hase yeeshee natiijada kulanka ayaa ku soo dhammaatay 1-1 oo labada Jaamacadood isku mari waayeen.
Sida sharciga ah waxaa lagu kula saaray labada Jaamacadood Gool-kulaadyo waxaana 6-5 ku adkaatay Jaamacadda Horseed oo markii ugu horreysay ku guulaysatay tartanka Jaamacaddaha gobalka Banaadir 2021 oo Astaan Sports ay u qabaneyso sanadkii 2-aad Jaamacaddaha waxbarashada ee ka jiro dalka, inta tartanka uu socday waxaa garsoorayay garsoorayaal heer caalami ah oo diiwaangashan Xiriirka Somaalyeed ee kubbadda cagta, sidoo kale waxaa garoonka ku sugnaa Maamulka Astaan Sports xubno ka socday xiriirka Soomaaliyeed ee kubadda cagta maamulada jaamacaddaha qaar kamid ah madaxda kooxaha ka jiro dalka iyo marti sharaf kale oo lagu casuumay ka soo qaybgalka cayaarta kama dambeysta ee u dhexeesay Jaamacadaha kala ah Al-imra & Horseed.
Si kastaba Jaamacada Horseed ayaa noqotay horyaalka Jaamacaddaha gobolka banaadir 2021 waxaana jiri doono xaflad Astaan Sports ay ku bixin doonto Abaal-marinada tartanka sida cayaaryahanka ku guuleystay gool-dhalinta kooxdii soo bandhigtay qaab cayaareedkii ugu wanaagsanaa inta uu socday tartanka iyo Abaal-marino kale.
WQ/Daacad
