SAWIRRO: Kooxda Kubbadda Cagta Gaadiidka Oo Saaka Samaysay Tababarkeedii Ugu Horreeyay.
Kooxda kubbadda cagta Gaadiidka ayaa saaka samaysay tababar ay ugu diyaar garooweyso xili cayaareedka cusub iyo tartanka koobka General Daa’’uud oo dhawaan furmi doono, naadiga Gaadiidka oo xili cayaareedkii dhammaaday 2020-2021 ka badbaaday iney u dhacaan horyaalka heerka labaad ayaa ku dhammaysatay kaaalinta 8-aad ee kala sareynta horyaalka heerka koowaad ee dalkeenna Somali Premier League.
Tababarka saaka kooxda kubadda cagta Gaadiidka ay ku samaysay garoonka Muqdisho Stadium, waxaa ka soo dhexmuuqday wejiyo ku cusub naadiga Gaadiidka wallow cayaartoyda qaar ay ku maqnaayeen fasax, macalin Daadir Amiin oo ah macalinka koowaad ee kooxda Gaadiidka ayaa Astaan Sports ugu warbixiyay diyaar garoowga ay ugu jiraan xili cayaareedka cusub isagoo sheegay in uu rajo wanaagsan ka qabo in kooxda Gaadiidka ay ku guulaysan doonto tartamada xili cayaareedka cusub 2021/2022 oo kooxda ay ka qayb galeyso.
Dhanka kale Macalin Daadir Amiin ayaa lagu xasuustaa inuu kooxda ka badbaadiyay iney u dhacdo horyaalka heerka labaad kaddib markii loo magacaabay shaqada macalinimo ee kooxda Gaadiidka dhammaadkii xili cayaareedkii dhammaaday Somali Premier League 2020/2021.
Si kastaba Tababarka kooxda kubbadda cagta Gaadiidka saaka waxaa ka soo dhexmuuqday cayaartoy ajaanib ah oo kooxda ku cusub iyo xiddiga ay dhawaan kala soo warreegeen kooxda Horseed Xasan Cabdinuur Geesey Xasaasi.
