SAWIRRO: Kooxda Geed Jaceyl oo guul weyn ka gaartay dhigeeda Carafaad tartanka cayaartoyda maqalka la’
Cayaartan oo u dhexeesay kooxaha Geed Jaceyl & Carafaad kana tirsanayd Guruubka A tartanka cayaartoyda maqalka la’ ayaa lagu cayaaray garoonka kubbadda cagta Macquul Stadium ee Degmada Waaberi.
Kulanka waxaa ku gacan sareysay kooxda kubbadda cagta Geed Jaceyl oo soo bandhigtay cayaar ku dhisan qaab weerar ah, waxaana sidoo kale bandhig wanaagsan sameeyay cayaaryahanka lambarka 8-aad Cabdullaahi Cusmaan oo ka tirsan kooxda Geed Jaceyl kaas oo dhaliya saddex gool, halka labada gool ee kale ay kala dhaliyeen xiddigaha kala ah Maxamed C/risaaq oo dhaliyay gool kulaad iyo lambarka 10-aad Bilaal Cabdi.
Cayaartoyda kooxda Carafaad ayaa dhankooda waxey dhaliyeen saddex gool waxaana labo kamid ah dhaliyay Maxamed Cabdiladiif, halka goolka kale uu u saxiixay Cabdi Aadan, natiijada cayaarta ayaana ku soo dhammaatay 5-3 ay ku adkaatay kooxda Geed Jaceyl.
Garsoore Axmed Baroodo ayaa bixiyay 4 calaamad oo ah kaarka digniinta waxaana wada qaatay cayaartoyda kooxda Geed Jaceyl xiddigaha kala ah Xasan Xuseen lambarka 4-aad, Siyaad Bashiir lambarka 6-aad, Cabdullaahi Cusmaan lambarka 8-aad iyo Bilaal oo lambarka 10-aad u xirto kooxda Geed Jaceyl, dhanka kooxda Carafaad ma jirin wax calaamad oo loo taagay inkastoo laga adkaaday haddane cayaar wanaag ayey muujiyeen kooxda Carafaad.
Si kastaba guusha kooxda Geed Jaceyl ay ka gaartay dhigeeda Carafaad waxey u ahayd guul ay u baahnaayeen marka la eego farqiga dhibcaha Guruubka A.
