SAWIRRO: Degmada Kaaraan oo guul ku furutay tartanka kubbadda cagta Degmooyinka Orgi Cup.
Waxaa magaalada Muqdisho ka furmay tartanka kubbadda cagta Degmooyinka ee Orgi Cup 2022 kaas oo ka qaybgalayaan 12 Degmo.
Kulanka furitaanka tartanka Orgi Cup waxaa martigalisay Degmada Kaxda oo cayaarta furitaanka la cayaartay Kaaraan waxaana lagu cayaaray mid ka mid ah garoomada kubbadda cagta ee Degmada Kaxda.
Furitaanka tartanka waxaa ka soo qaybgalay Maamulka Astaan Sports, Guddoomiyaha cayaaraha Degmada Kaxda, qaar ka mid ah dhallinyarada qaba baahiyaha gaarka oo halkaasi ku soo bandhigay cayaaro ay ugu talagaleen iney ugu qayb qaataan furitaanka koobka Orgi Cup, iyo marti sharaf kale oo lagu casuumay.
Cayaarta furitaanka oo ahayd mid xiiso gaara lahayd ayaa dhex martay Degmooyinka Kaaraan & Kaxda, cayaartoyda kala matalayay labada dhinac ayaa soo bandhigay cayaar qurux badan waxaana natiijada kulanka ku soo dhammaatay 3-1 oo ku adkaatay Degmada Kaaraan.
Markii cayaarta ay soo dhammaatay waxaa la bixiyay xiddigii ugu wanaagsanaa garoonka waxaana la siiyay kabtanka Degmada Kaaraan Ilyaas halka cayaaryahankii ugu bandhiga xumaa la siiyay kabtanka Degmada Kaxda Yuusuf Islaam.
Si kastaba tartanka Orgi Cup waxaa soo qaban qaabisay Astaan Sports waxaana ka qaybgalayo 12 Degmo waxaana kala hoggaaminayo qaar ka mid ah dhallinyarada magaca kuleh Baraha Bulshada iyo wariyaasha cayaaraha Dalka.
