SAWIRRO: Waaxaha 1-da Luulyo & Tawakal oo sameeyey tababarkii ugu dambeeyey D/Daaru-salaam.
Deegaanka Daarusalaam waxaa ka socdo diyaar-garowga tartan kubbadda cagta oo loo qabanayo kooxaha ka dhisan waaxaha ay ka kooban tahay Deegaanka Daarusalaam.
Ujeedada loo qabanayo tartanka waaxaha Deegaanka Daarusalaam ayaa ah in laga soo xulo cayaartoyda Deegaanka Daarusalaam ku matali doono tartanka kubbadda cagta Degmooyinka iyo Deegaannada Gobolka Banaadir 2022 oo dhawaan la sameeyay isku-aadkiisa.
Isku-aadka tartanka kubbadda cagta Degmooyinka & Deegaannada Gobolka Banaadir Deegaanka Daarusalaam ayaa ka soo muuqday Guruubka A waxaana kula jiro Degmooyinka kala ah Boondheere, Dharkenley, Kaxda iyo Deegaanka Gobadley.
Guddoomiyaha cayaaraha Deegaanka Daarusalaam Colaad Cabdi Cali oo la hadlay Astaan Sports ayaa sheegay in sannadkan ay rajeenayaan iney soo saaraan cayaartoy ku matali doono Deegaanka tartanka kubbadda cagta Degmooyinka & Deegaannada Gobolka Banaadir oo sannadkii labaad ay ka qaybgalayaan taasna ay tahay sababta ay u qabanayaan tartanka waaxaha Deegaanka Daarusalaam.
Si kastaba tartanka waaxaha Deegaanka Daarusalaam ayaa furmi doono beri oo ah maalin Isniin tariikhduna tahay 26/09/2022.
