Waa tuma xiddigtii ugu horreysay ee iyadoo xiran xijaab ka soo muuqata koobka adduunka haweenka?
Nouhaila Benzina ayaa noqotay xiddigtii ugu horreysay oo iyadoo xiran xijaab ka soo muuqata koobka adduunka ee haweenka 2023.
Nouhaila Benzina waxa ay daafaca uga ciyaartaa xulka qaranka Morocco waxayna noqotay haweeneydii ugu horreysay ee iyadoo xiran xijaab ka soo muuqata koobka Adduunka ee dumarka oo si habsami leh uga soconaya dalalka Australia iyo New Zealand.
Waa 25-sano jir kubadda cagta ku xamaalata, waxaana ay sidoo kale u ciyaarta kooxda ka dhisan Morocco ee Royal Army Football Club (FAR), iyadoo xulka qaranka Morocco ku soo biirtay sanadkii 2018.
Ka hor inta aysan u soo dallicin xulka qaranka waa weyn ee Morocco sanadkii 2018 waxa ay u soo ciyaartay oo ay xirfaddeeda ciyaareed ku soo bandhigtay xulka dumarka qaranka Morocco ee xiddigaha da’doodu ka hooseyso 20-jirada sanadkii 2017.
Diyaargarow adag oo ay soo galeen gabdhaha qaranka Morocco waxa ay u soo baxeen koobka Adduunka dumarka ee sanadkan lagu ciyaarayo dalalka Australia iyo New Zealand.
Xulka qaranka Morocco ee haweenku waxa ay guruubka H la galeen xulalka dumarka Colombia, South Korea iyo Germany.
Kulankoodii ugu horreeyey heerka guruubyada waxa ay xulka dumarka Morocco la ciyaareen dhiggooda Germany 24-kii July waxaana ay kala kulmeen guuldarro xanuun badan oo 6-0 ah, iyadoo kulankaas aan kursiga keydka laga soo kicin gabadha aan sheekadeeda hayno ee Nouhaila Benzina.
Yeelkeede, waxa ay safka hore uga soo billaabatay kulankoodii labaad ee heerka guruubyada koobka Adduunka, kulankaasna xulka Morocco waxa ay gaareen guushoodii ugu horreysay ee koobka Adduunka dumarka 2023.
Nouhaila Benzina oo daafaca uga ciyaarta xulka qaranka Morocco ayaa iyadoo xiran xijaabka waxa ay xasilisay daafaca xulka, kulankoodii ugu dambeeyey, taasoo keentay inay 1-0 uga adkaadaan dhiggooda South Korea.
Xulka qaranka Haweenka Morocco waxa ay kaalinta saddexaad uga jiraan kala sarreynta heerka guruubyada Koobka Adduunka dumarka 2023 kaddib markii ay hal guul gaareen labadii kulan oo ay ciyaareen ilaa iyo haatan, iyagoo min 3 dhibcood la wadaaga xulalka dumarka ee Germany iyo Colombia oo ka horreeya.
Kulankooda ugu dambeeya heerka guruubyada Koobka Adduunka dumarka waxa ay gabdhaha Morocco la ciyaari doonaan dhiggooda Colombia 03 bisha Agoosto 2023.
Astaan Sports
