RASMI: Kylian Mbappe oo dib loogu soo daray safka kooxda koowaad ee Paris Saint-Germain

Weeraryahanka reer France ee Kylian Mbappe ayaa dib loogu soo daray shaxda kooxda koowaad ee PSG.

Kooxda kubadda cagta Paris Saint-Germain ayaa shaaca ka qaadday inay shaxdeeda ku soo dartay Kylian Mbappe.

Bayaanka ka soo baxay kooxda PSG ayaa u dhignaa: “Kaddib wadahadallo wax ku ool ah oo dhex maray PSG iyo Kylian Mbappé ka hor kulanka Lorient, ciyaaryahanka ayaa saaka dib loogu soo celiyay tababarka kooxda koowaad.”

Kylian Mbappe ayaa tababar ku qaadanayay bannaanka kooxda tan iyo markii ay kooxdu u ambabaxday safarkii ay ku aaddan Japan iyo South Korea ka hor xilli ciyaareedka cusub kaddib markii kabtanka France uu diiday inuu kooxda qandaraaska u kordhiyo.

PSG ayaan doonaynin inay sahal ku lumiso Kylian Mbappe, waxaana ay u badan tahay inuusan xagagaan ka tagi doonin caasimadda Faransiiska oo uu qandaraas cusub qalinka ugu duugi doono PSG.

Astaan Sports