Xaafadda Suuqa Xoolaha ee degmada Yaaqshiid ayaa laga furay garoon kubbadda cagta ah oo loogu magacdaray Lafaha Stadium waxaana daah-furka garoonka ka soo qayb-galay taageerayaal badan oo jacel kubbadda cagta.
Waxaa qudbado kooban ka jeediyay furitaanka garoonka maamulka garoonka Lafaha Stadium iyo xubno ka tirsan bahda ciyaaraha Degmada Yaaqshiid iyo xaafadda Suuqa Xoolaha gaar ahaan deegaanka daban-doob.
Kulanka lagu daah-furay garoonka Lafaha waxaa wada ciyaaray kooxaha kala ah Marka Cadey iyo Suuqa Xoolaha, ciyaarta daah-furka oo ahayd mid aad u xiiso badan labada kooxood ayaa soo bandhigay ciyaar qurux badan waxaana natiijada ciyaarta ay ku soo dhammaatay 3-3.
Mudooyinkii ugu dambeeyay waxaa magaalada Muqdisho ku soo badanayay garoomo lagu ciyaaro kubbadda cagta iyadoo dhalinta ku nool caasimada ay fursad u helaan iney ku soo bandhigaan xirfadooda kubbadda cagta.
