War qoraal oo ka soo baxay Wasaaradda dhallinyarada & Ciyaaraha ayaa lagu sheegay iney baaqatay ciyaartii fiinaalka ahayd ee u dhexeysay Iskuulada Macallin Jaamac & Global 1.
Warkan oo lagu baahiyay barta Facebook ay ku leedahay Wasaaradda dhallinyarada & Ciyaaraha daqiiqada yar ka hor ayaa lagu sheegay in kulanka fiinaalka uu u baaqday sababa jiro hase yeeshee la ciyaari doono maalinta Khamiista oo taariikhda ku beegan tahay 26 bishan October 2023.
Waxaa sanadkan ay ka qayb-galeen tartanka Iskuulada gobalka banaadir 32-iskuul oo ka mid ah Iskuulada ku yaalo magaalada Muqdisho.
Ciyaarta fiinaalka ayaa lagu balansanaa iney maanta wada ciyaaraan kooxaha kala ah Macallin Jaamac Vs Global 1 oo iskugu soo haray fiinaalka tartanka Iskuulada gobalk banaadir, labada dhinac ayaa ku jiray diyaar garow maalmihii ugu dambeeyay iyadoo dhan kasta uu doonayo inuu ku guuleysto tartanka.
Tartanka Iskuulada gobalka banaadir waxaa si wada jir iskaga kaashaday sanadkan Wasaaradda Dhallinyarada & Ciyaaraha iyo Midowga Dugsiyada Gobalka Banaadir, iyagoo garab ka helayo xiriir kubbadda cagta Soomaaliya.
Muddo ku dhaw labo bil ayuu tartanka socday, waana markii ugu horreysay oo tartan sidan u weyn ay si wadajir ah iskaga kaashadaan Wasaaradda Dhallinyarada & Ciyaaraha iyo Midowga Dugsiyada Gobalka Banaadir.
