Kulankan oo u dhexeeyay xulalka Koofur Galbeed & Jubbalan ayaa lagu ciyaaray garoonka kubbadda cagta Muqdisho Stadium.
Ciyaarta oo ahayd mid aad u adag labada xul ayaa soo bandhigay ciyaar weerar & weerar celis ah waxaana qaybtii koowaad oo ku dhaw dhammaad hoggaanka u dhiibay xulka Jubbaland ciyaaryahanka lambarka 17-aad Bakar Shufale Yuusuf daqiiqadii 38-aad waxaana lagu kala nastay 1-0 oo hoggaanka ku haysay xulka Jubbaland.
Marka dib la isugu soo laabtay qaybtii labaad ee ciyaarta macalinka xulka K/galbeed wuxuu sameeyay beddelo wax weyn ka beddelay ciyaarta waxaana uu keenay ciyaaryahanka lambarka 11-aad Cabdirisaaq Maxamed Cadow, isagoo ciyaarta ka saaray lambarka 7-aad Cabdqani Axmed Cabdi daqiiqadii 61-aad ee kulanka.
Cabdirisaaq Maxamed Cadow ayaa ciyaarta ka dhigay barbaro daqiiqadii 76-aad, taas oo rajada ku soo celisay xiddigaha Koofur Galbeed, dhammaadkii ciyaarta afar daqiiqo oo lagu daray ciyaarta ayay heleen goolka guusha ciyaartoyda Koofur Galbeed waxaana u dhaliyay ciyaaryahanka lambarka 17-aad Cabdiraxmaan Xasan Daani daqiiqadii 94-aad ee ciyaarta kulanka ayaana ku soo dhammaaday 2-1 oo ku adkaatay xulka Koofur Galbeed.
Garsoore Axmed Xasan Xuseen Kaafi ayaa bixiyay saddex kaar oo ah kaarka digniinta waxaana dhammaan la siiyay xiddigaha xulka Jubbaland dhanka Koofur Galbeed wax kaar ah lama siinin Koofur Galbeed ayaa hadda leh Saddex dhibcood maadaama kulankii hore laga soo adkaaday halka Jubbaland aysan lahayn wax dhibic ah waxaana laga adkaaday labadii kulan ay soo ciyaartay xulka Koofur Galbeed ayaa la ciyaari doono Arbacada soo socoto xulka Hirshabeelle oo leh afar dhibcood haddii kulankaasi ay badiyaan waxay leeyihiin rajo wanaagsan ay ugu gudbi karaan afar dhammaadka tartanka Maamul Goboleedyada & Gobolka Banaadir.
