SAWIRRO: Xulka Galmudug oo u gudbay wareegga afar dhammaadka tartanka Maamul Goboleedyada.
Xulka Galmudug ayaa u gudbay wareegga afar dhammaadka tartanka kubbadda cagta maamul goboleedyada & gobolka banaadir kaddib markii ay guul ka gaareen dhiggooda Koofur Galbeed.
Qaybtii koowaad ee ciyaarta daqiiqadii 36-aad waxaa hoggaanka u dhiibay xulka kubbadda cagta Galmudug ciyaaryahanka lambarka 14-aad Ayuub Cabdullaahi Bashiir daqiiqadii 36-aad ee ciyaarta kaddib markii uu caawin ka helay saaxiibkiisa Diini Axmed Daahir, inta aan la aadin nasashada waxaa goolkii labaad u dhaliyay xulka Galmudug Diini Axmed Daahir kubbad gees laad ahayd waana gees laadkii ugu horreeyay ee taariikhda laga dhaliyo tartanka kubbadda cagta maamul goboleedyada & gobolka banaadir waxaana lagu kala nastay 2-0 oo hoggaanka ku haysay xulka Galmudug.
Marka dib la isgu soo laabtay qaybtii labaad ee kulanka xulka Koofur Galbeed waxay sameeyeen dadaalo badan hase yeeshee wax gool ah ma aysan dhallin dhammaadkii qaybtii labaad waxaa goolkii saddexaad u dhaliyay Galmudug ciyaaryahanka lambarka 10-aad Ashraf Daahir Maxamuud daqiiqadii 80-aad, nastiijada ciyaarta ayaana ku soo dhammaatay 3-0 oo ku adkaatay Galmudug.
Garsooraha kulanka dhex-dhexaadinayay wuxuu ahaa Cabdullaahi Xaaji kaas oo bixiyay kaarka digniinta.
Xulka Galmudug waxay xaqiijiyeen iney u gudbeen wareegga afar dhammaadka tartanka kubbadda cagta maamul goboleedyada halka xulka Koofur galbeed ay la ciyaari doonaan kulankooda afaraad xulka Hirshabeelle taasoo haddii ay adkaadaan u xaqiijin karto iney u gudbaan wareegga afar dhammaadka koobka Maamul Goboleedyada & Gobolka Banaadir.
