Kooxda kubbadda cagta Dekedaha ayaa guul muhiim ah ka gaartay Elman SC kulan ka tirsanaa horyaalka kubbadda cagta Somali National League, oo lagu ciyaaray garoonka kubbadda cagta Eng-yariisow ee Degmada Cabdicasiis.
Daqiiqadii 15-aad ee ciyaarta kooxda Dekedaha ayaa la wareegtay hoggaanka kulanka kaddib gool uu u dhalliyay ciyaaryahanka lambarka 17-aad Asagoe kaasoo ciyaarta ka dhigay 1-0 oo lagu kala nastay qaybtii koowaad ee kulanka.
Qaybtii labaad ee ciyaarta kooxda Dekedaha ayaa sii dheereysatay hoggaanka ciyaarta kaddib markii lagu abaal-mariyay gool kulaad uu qaladkeeda lahaa goolhayaha kooxda Elman SC, Mustaf Karaama kaas oo diilinta ganaaxa guddaheed ku jilaafay kabtanka kooxda Dekedaha Xaaji Macalim daqiiqadii 59-aad qaybtii labaad ee ciyaarta, waxaana gool u beddelay ciyaaryahankii hore Elman SC Nuur Iraad, kaas oo hadda ka tirsan Dekedaha, natiijada ciyaarta ayaana ku soo dhammaatay 2-0 oo ku adkaatay kooxda Dekedaha.
Kooxda kubbadda Dekedaha oo ciyaartay afar kulan horyaalka Somali National League, ayaa gaartay labo guul sidoo kale waxay barbaro galeen labo kulan halka aan laga adkaanin horyaalka Somali National League.
Dhanka kale kooxda kubbadda cagta Elman SC oo ciyaartay afar kulan ayaan weli wax guul ah gaarin waxaa laga adkaaday labo kulan halka ay barbaro galeen labo ciyaar horyaalka Somali National League.
Wareegga afaraad ee horyaalka Somali National League ayaa si xiiso leh ugu socdo garoonka kubbadda cagta Eng-yariisow ee degmada Cabdicasiis.
