Kooxda kubbadda cagta Dekedaha ayaa guul muhiim ah ka gaartay dhiggeeda Jeenyo kulan ka tirsanaa horyaalka kubbadda cagta Somali National League, oo lagu ciyaaray garoonka kubbadda cagta Eng-yariisow ee Degmada Cabdicasiis.
Kooxda Jeenyo waxaa soo martay fursado goolal noqon karay bilowgii ciyaarta hase yeeshee kama faa’iideysan, daqiiqadii 45-aad waxaa kaarka guduudan loo taagay ciyaaryahanka lambarka 17-aad ee Jeenyo Outara Madenon kaddib markii uu qalad ku galay mid ka mid ah ciyaartoyda kooxda Dekedaha waxaana lagu kala nastay 0-0 qaybtii koowaad ee ciyaarta.
Markii dib la isugu soo laabtay qaybtii labaad ee ciyaarta kooxda Dekedaha waxaa hoggaanka kulanka u dhiibay kabtankooda lambarka 10-aad Aweys Aadan daqiiqadii 57-aad wuxuuna ciyaarta ka dhigay 1-0.
Kooxda kubbadda cagta Dekedaha oo u muuqatay mid ka faa’iideysatay ciyaaryahanka laga saaray kooxda Jeenyo ayaa sii dheereysatay hoggaanka ciyaarta kaddib markii uu gool u dhalliyay daqiiqadii 70-aad ciyaaryahanka lambarka 44-aad Cabdiwahaab Aweys oo beddel ku soo galay kulanka qaybtii labaad.
Kooxda kubbadda cagta Jeenyo ayaa heshay gool yimid waqtigii lagu daray ciyaarta daqiiqadii 94-aad waxaana u dhalliyay ciyaaryahanka lambarka 18-aad Iria Mustapha waxaana natiijada ciyaarta ay ku soo dhammaatay 2-1 oo ku adkaatay kooxda Dekedaha.
Kooxda Dekedaha oo ciyaartay Shan kulan horyaalka Somali National League, ayaa gaartay saddex guul sidoo kale waxay barbaro galeen labo kulan halka aan laga adkaanin horyaalka Somali National League.
Dhanka kale naadiga Jeenyo Jeeno oo ciyaartay shan kulan horyaalka Somali National League, ayaa laga adkaaday saddex ciyaar kaliya hal guul ayay gaareen sidoo kale waxay barbaro galeenhal kulan ciyaaraha horyaalka Somali National League.
Wareegga afaraad ee horyaalka Somali National League ayaa si xiiso leh ugu socdo garoonka kubbadda cagta Eng-yariisow ee degmada Cabdicasiis.
