SAWIRRO: Cabdi Joon oo guuldaradii ugu horreesay ka soo gaartay MCC Somali National League.
Macalin Cabdi Joon ayaa guuldarro ku furtay wejiga labaad ee horyaalka heerka koowaad Somali National League kulankii ugu horreeyay uu hoggaamiyo kooxda Heegan oo dhawaan loo magacaabay kaddib markii kooxda MCC ay ka adkaatay.
Kulankan oo ahaa mid aad u adag qaybtii koowaad waxaa hoggaanka u dhiibay kooxda MCC ciyaaryahanka dhawaangalka ah ee lambarka 12-aad Feysal Cali Xuseen daqiiqadii 31-aad ee ciyaarta waxaana uu mar kale dhalliyay goolkiisa labaad daqiiqadii 39-aad kaddib markii uu madax ku dhammaystiray kubbad ahayd gees laad waxaana lagu kala nastay 2-0 oo hoggaanka ku haysay kooxda MCC.
Qaybtii labaad ee ciyaarta labada kooxood waxay soo bandhigeen ciyaar weerar iyo weerar celis waxaana kooxda Heegan ay iska soo celiyeen hal gool daqiiqadihii lagu daray ciyaarta kaddib markii kubbad ahayd laadka xurta (Free Kick ) uu u dhalliyay ciyaaryahanka lambarka 2-aad Janathan Okachu waxaana natiijada ciyaarta ay ku soo dhammaatay 2-1 oo ku adkaatay kooxda MCC.
Kooxda kubbadda cagta Heegay oo ciyaartay kulankii 12-aad ayaa la kulantay guuldarradii saddexaad waxay barbaro galeen shan kulan, iyagoo adkaaday 4-ciyaar waxayna sidaasi ku leeyihiin 22-dhicood horyaalka Somali Natinal League.
Dhanka kale Kooxda k/cagta MCC oo ciyaartay kulankii 12-aad ayaa gaartay guushii lixaad waxay barbaro galeen afar kulan halka laga adkaaday labo ciyaar waxayna hadda leeyihiin 22-dhibcood horyaalka Somali Natinal League.
Waxaa xusid mudan in Macalin Cabdi Joon oo dhawaan loo magacaabay tababaraha kooxda Heegan SC oo la kulmay guuldaradii ugu horreesay horyaalka Somali National League.
