SAWIRRO: Kooxda Dekaddaha Oo U Awood Sheegatay Naadiga Jeenyo Kulan Ka tirsanaa SPL.
Kooxda kubadda cagta Dekaddaha ayaa galabta guul weyn ka gaartay naadiga Jeenyo kulan ka tirsanaa horyaalka Somaali Premier leagu oo lagu ciyaaray garoonka Eng-yariisoow ee degmada C/casiis.
Ciyaartan oo ku gacan sareysay kooxda dekaddaha waxaa daqiiqadii 7-aad goolka 1-aad u dhaliyay ciyaaryahanka lambarka 16-aad Xaaji Macalin Aadan kadib markii uu caawin ka helay weeraryahanka lagu magacaabo Rechard Qaybtii koobaad oo dhamaad ku dhaw waxaa goolka labaad u dhaliyay kooxda Dekaddaha kabtankooda Cabaas Amiin kadib markii uu shabaqa kooxda Jeenyo ka toogtay meel ka baxsan diilinta ganaaxa daqiiqadii 44-aad, waxaana qaybtii koobaad lagu kala nastay 2-0 ay ku hoggaamineyso kooxda Dekaddaha.
Garsoore Xasan Kaafi Shiine oo ahaa garsooraha kulankaan ayaa bixiyay calaamada hurdiga ama digniinta wuxuuna kala siiyay labada kabtan kooxaha Jeenyo iyo Dekaddaha calaamadii ugu horreysay waxaa loo taagay kabtanka kooxda k/cagta Jeenyo Liibaan Muqtaar daqiiqadii 17-aad ee kulanka halka calaamada kale la siiyay kabtanka kooxda Dekaddaha Cabaas Amiin daqiiqadii 32-aad ee ciyaarta ma jirin calaamad kale oo la bixiyay qaybtii hore.
Marka dib la isugu laabtay qaybtii labaad kooxda Jeenyo waxey soo bandhigeen qaab ciyaareed weerar ah wallow aysan ka faa’’iideysan fursadihii soo maray laakiin waxaa dhabar jab ku noqotay markii ciyaarta laga saaray ciyaaryahankooda lambarka 14-aad u xirto Bashiir C/dulle oo loo taagay kaarka casaanka kadib markii uu qalad ku galay ciyaaryahan ka tirsan kooxda Dekaddaha taas oo keentay in garsoore Xasan Kaafi uu si toos ah ciyaarta ugu saary.
Dhanka kale Kooxda Dekaddaha waxey halkoodii kasii wateen bandhiga goolasha, waxaana mar kale shabaqa soo taabtay Xaaji Macalim Aadan, oo goolkiisa labaad ka toogtay mel ka baxsan diilinta 18-ka caawin uu mar kale ka helay weeraryahanka lagu magacaabo Rechard wuxuuna natiijada ciyaarta ka dhigay 3-0 hase yeeshee waxaa soo gebgabeeyay bandhiga goolasha kooxda Dekaddaha, ciyaaryahanka daafaca bidix Rafael Adada oo ciyaarta ka dhigay 4-0 daqiiqadii 74-aad, natiijada ciyaarta ayaana ku soo dhamaatay 4-0 ay ku adkaatay kooxda Dekaddaha oo galabta gaartay guushii ugu weyneed tan iyo furitaanka horyaalka Somaali Premier leagu.
WQ/ Daacad
