Kooxaha kubbadda cagta Raadsan iyo Jeenyo ayaa ku wada cayaaray garoonka Muqdisho Stadium kulan ka tirsanaa wejiga labaad ee horyaalka heerka koowaad ee dalkeena Somali Premier League todabaadkii 14-aad,
Labada kooxood ayaa soo bandhigay qaybtii koowaad cayaar awood ahaan garbo siman ku socotay, waxaana jiray fursado ay abuureen labada dhinac hase yeeshee ma aheyn fursado goolal ku dhasheen, qaybtii koowaad ee cayaarta ayaa la isku mari waayay 0-0
Marka dib la isugu soo laabtay qaybtii labaad ee kulanka waxey labada kooxood soo bandhigeen cayaar ku dhisan weerar iyo weerar celis walloow fursado halis ah ay abuureen cayaartoyda kooxda Raadsan, sidoo kale cayaartoyda naadiga Jeenyo waxey abuureen fursado halis ku ahaa kooxda Raadsan hase yeeshee labada dhinac kama faa”iideysan fursadaha soo maray, Natiijada cayaarta ayaana ku soo dhammaatay 0-0 oo labada dhinac ay ku heshiiyeen.
Garsoore C/Fitaax Saciid Mire oo ahaa garsooraha kulankan ayaana bixin wax kaar ah taas oo ka dhigan in cayaartan ay aheyd cayaartii ugu horreeysay oo wax kaar ah aan la bixin inta uu socdo horyaalka fasal cayaareedka 2020/2021.
Si kastaba barbaraha ay gashay kooxda Raadsan ayaa ka dhigan iney dib ugu dhacday kaalinta 4-aad iyagoo leh 26-dhibcoo halka naadiga Jeenyo ay ku sii jiri doonto kaalinta 5-aad iyagoo leh 17- dhibcood kala sareynta horyaalka heerka koowaad ee Somali Premier League.
WQ/Daacad
