SAWIRRO: Maamulka Kooxda Gift Stares Oo Kulan Dhiirigilin Ah U Sameeyay Ciyaaryahanada kooxda Gift Stares.
Maamulka kooxda kubada kolayga ee Gift Stares ayaa kulan iskugu jiro dhiirigilin iyo mahadcelin ah u sameeyay ciyaaryahanada kooxda kubadda kolayga ee Gift Stares oo jimcihii ku guuleystay koobka kubadda kolayga ee Genaral Daa’uud 2021
Kulankaan dhiiragalinta ahaa waxaa ka soo qaybgalay masuuliyiin ka tirsan xiriirka Soomaaliyeed ee kubada kolayga, xilibaano ka tirsan Dowlada Soomaaliya iyo bahda ciyaaraha kubadda kolayga.
Ugu horreyn Afahayeenka Maamulka Gobolka Banaadir oo hadal kooban goobta ka jeediyay munaasabada ayaa aad ugu mahadceliyay masuuliyiintii soo qaban qaabiyay munaasabaddan abaalmarinta ah isagoo sidoo kale wuxuu u hambalyeeyay guusha ay ka gaareen tartankaan kubadda kolayga kooxda Gift Stares.
Dhanka kale Xaaji Roombe oo ah la taliyaha wasaaradda dhalinyarada iyo ciyaaraha Soomaaliya ayaa sheegay in uu aad ugu faraxsanyahay ka soo qaybgalka munaasabaddan lagu abaalmarinayay ciyaryahanada kooxda Gift Stares, isagoo intaa ku daray in dadaal xoogan ay muujiyeen xiddigaha kubadda kolayga kooxda Gift Stares,
Waxaa sidoo kale martida lagu casuumay xafladaan kamid ahaa Axmed Muuse oo ahaa xidig hore oo kubadda kolayga hore u soo ciyaaray wuxuuna carbka ku dhuftay inuu aad ugu faraxsan yahay ku guuleysiga koobka kubadda kolayga ee kooxda Gift Stares, isagoo sidoo kale u hambalyeyay dhamaan kooxihii kale ee ka qaybgalay koobka kubadda koleyga iyo dadaalada ay sameeyeen intii uu socday tartanka kubadda kolayga Janaral Daa’uud 2021.
Tababaraha kooxda Gift Stares Daa’uud Axmed dheere oo ka mid ahaa dadkii qudbadaha kala duwan ka jeediyay xaflada ayaa sheegay in guushaan ay tahay guul ay si wadajir ah ugu shaqeeyeen maamulka iyo ciyaaryahaanda kooxda Gift Sares isagoo intaa ku daray inuu aad ugu faraxsanyahy ku guuleysiga koobkan qiimaha badan oo kooxdiisa kubadda kolayga Gift Stares ku guuleysatay.
Ugu dambeentii wasiir ku xigeenka wasaaradda gaashaandhiga Soomaaliya Xildhibaan Abdulfatah Kasim oo ah shaqsi aad u xiiseeyo sports-ka qaybihiisa kala duwan oo munaasabadda soo xiray, ayaa ugu mahadceliyay guuleestayaasha koobka kubadda kolayga, isagoo sidoo kale guul u rajeeyay dhamaan kooxihii ka qaybgalay koobka kubadda kolayga ee Janaral Daa’uud 2021, sanad ciyaareedka soo socda.
Si kastaba Kooxda Gift Stares ayaa fiinaalka koobka ka adkaatay kooxda kubadda koleyga ee Dekaddaha oo ay kaga adkaadeen 74-84 dhibcood waxaana ay sidaasi ku hanteen koobka taariikhiga ah ee Janaral Daa’uud 2021.
