Waxaa galabta la soo gabagabeeyay tartankii xiisaha badnaa ee Astaan Business Cup 2021, waxaana fiinaalka tartankan galabta wada ciyaaray shirkadaha ganacsiga ee kala ah Blue Sky & Baari Exp oo soo gaaray kama dambeysta tartanka Astaan Business Cup.
Ciyaarta galabta oo ahayd mid aad u xiiso badan, labada kooxood ayaa soo bandhigay qaab ciyaareed aad u wanaagsan, qaybtii koowaad ee kulanka ayaa lagu kala nastay 2-1 oo hoggaanka ku haysay Shirkada Baari Exp.
Marka dib la isugu soo laabtay qaybtii labaad ee ciyaarta shirkada Blue Sky ayaa iska soo barbareysay ciyaarta, waxaana daqiiqadihii dambe ay keensadeen goolka guusha, natiijada ciyaarta ayaana ku soo dhamaatay 3-2 ay ku adkaatay shirkada Blue Sky oo loo diiwan galiyay ku guuleysiga koobkan oo sanadkii laabaad loo qabtay shirkadaha ganacsiga ee xarumaha ku leh magaalada Muqdisho.
Kulanka galabta waxaa ka soo qaybgalay guddoomiye ku xigeenka koowaad xiriirka soomaaliyeed ee kubadda cagta Mudane Cali Shiine, iyo guddoomiye ku xigeenka labaad ee xiriirka soomaaliyeed, Mudane Cabdullaahi Shiiq guddoomiyaaasha kooxaha heerarka kala duwan ee dalkeena, guddiga tartanka iyo marti sharaf kale oo dhamaantood qudbado kale duwan ka jeediyay madasha.
Si kastaba tartankaan Astaan Business Cup 2021, waxaa sanadkiisa labaad ka qaybgalay 32-Shirkadood waxaana qabashadiisa iyo taabagalintiisu lahaa Shirkadda Astaan halka door muhiim ah ay ka qaateen xiriirka soomaaliyeed ee kubadda cagta oo Astaan ka caawiyay garsoorayaasha maamulayay tartankan Astaan Busness Cup 2021
W/Q: Shucayb Haamud Ibraahim
