Macallinka Arsenal ee Mikel Arteta oo Man City ugu hambalyeeyay hanashada horyaalka Premier League
Macallinka kooxda kubadda cagta Arsenal ee Mikel Arteta ayaa Manchester City iyo Tababare Pep Guardiola ugu hambalyeeyay hanashadooda horyaalka Premier League.
Arsenal ayaa hoggaanka u haystay horyaalka Premier League inta badan kal ciyaareedkan, laakiin todobaadyadii ugu dambeeyey ayay rajadoodii burburay kaddib markii ay dhibco badan lumiyeen.
Haddaba Macallinka Gunners ee Arteta ayaa hambalyo u diray Man City kaddib markii ay xaqiijiyeen ku guuleysigooda horyaalka, waxaana uu yiri: “Ugu horreyntii waxaan hambalyo leeyahay Man City oo ku guuleysatay horyaalka, balse annaga waxa ay inoo tahay maalin xun.
“Waa inaan runta aqbalnaa, maanta waxa ay Nottingham Forest naga dhalisay gool, waana ka soo laaban waynay, waxaana badisay kooxdii fiicnayd, aniga ayaa masuul ka ah oo dusha saaranaya marka ay arrimuhu fiican yihiin iyo marka ay xun yihiinba.” ayuu hadalkiisa ku daray Tababare Arteta.
Kooxda Manchester City ayaa xaqiijisatay ku guuleysigooda horyaalka Premier League, iyadoo saddex kulan gacanta ku haysata oo aan wali ciyaarin, kaddib markii ay Arsenal guuldarro 1-0 ah kala soo kulantay kooxda Nottingham Forest oo ay booqatay.
Astaan Sports
