Kooxda kubbadda cagta Horseed ayaa guul ka gaartay naadiga Jeenyo kulan ka tirsanaa horyaalka Somali National League, oo lagu ciyaaray garoonka kubbadda cagta Eng-yariisow ee Degmada Cabdicasiis.
Qaybtii koowaad ee kulanka kooxda Horseed ayaa la timed gool uu u dhalliyay ciyaaryahanka lambarka 10-aad Farxaan Xiddig daqiiqadii 23-aad ee ciyaarta waxaana lagu kala nastay 1-0 oo hoggaanka ku haysay kooxda Horseed.
Marka dib la isugu soo laabtay qaybtii labaad ee ciyaarta ciyaaryahankii hore ee Jeenyo Cabdicasiis Catoosh ayaa kooxdiisa hore ee Jeenyo ka dhalliyay kubbad ahayd (Free Kick) ama laadka xurta ah daqiiqadii 67-aad ee ciyaarta, waxaana natiijada kulanka ay ku soo dhammaatay 2-0 oo ku adkaatay kooxda oo gaartay guushii koowaad ee horyaalka Somali National League.
Kooxda kubbadda cagta Horseed ayaa hadda leh afar dhibcood labo kulan ay ciyaartay horyaalka Somali National League, kulankii koowaad waxay barbaro 0-O la soo gashay kooxda Elman SC.
Dhanka kale kooxda kubbadda Jeenyo waxaa soo gaartay guuldarradii labaad oo xiriir ah horyaalka Somali National League, kulankoodii koowaad waxay guuldarro 2-1 ah ay kala kulantay kooxda Saxafi halka kulankii labaad ay guuldarro ka soo gaartay kooxda Horseed.
Macalin Cabdi Joon oo dib ugu soo laabtay kooxda Horseed ayaa ku hoggaamiyay gushii ugu horreysay xilli ciyaareedka cusub 2023/24 horyaalka Somali National League.
