Xulka qaranka kubadda cagta Soomaaliya ayaa la kulmay guuldarradii labaad ee saaxiibtinimo xilli ay la ciyaareen xulka qaranka Sierra Leone.
Ciyaartan oo lagu ciyaaray garoonka Berrechid Municipal ee ku yaalla dalka Morocco ayaa qaybtii koowaad lagu kala nastay 1-0 oo hoggaanka ku haysay Sierra Leone inkastoo wiilasha qarankeenna ay soo bandhigeen kubbad qurxoon.
Qaybtii labaad ee ciyaarta xulka kubbadda cagta Sierra Leone ayaa helay goolkii labaad ee ciyaarta waxaana natiijada ay ku soo dhammaatay 2-0 oo guusha ku qaadatay Sierra Leone.
Ciyaartoyda xulka qaranka Soomaaliya ayaa sidaas ku soo gabagabeeyay kulamadooda saaxiibtinnimo, waxaana kaddib ay u diyaar-garoobi doonaan kulammada isreeb-reebka koobka Adduunka ee 2026 oo ay la kala dheeli doonaan xulalka Algeria iyo Uganda.
